ვინაიდან, საქართველოს ტერიტორიაზე საგანგებო მდგომარეობის გამოცხადებასთან დაკავშირებით, ცალკეულ ობიექტებს, მაგალითად სილამაზის სალონებს, მათი ნებისაგან დამოუკიდებლად, საქართველოს მთავრობის დადგენილებით შეუჩერდათ საქმიანობა, მათ არ აქვთ ვალდებულება დამატებით აცნობონ საგადასახადო ორგანოს საქმიანობის შეჩერების თაობაზე, შესაბამისად საქმიანობის შეჩერების პერიოდში მათ არ დაეკისრებათ ფიქსირებული გადასახადი. რაც შეეხება სხვა, ფიქსირებული გადასახადის გადამხდელ ობიექტებს, რომელთა საქმიანობა არ შეჩერებულა საქართველოს მთავრობის დადგენილებით (მ.შ თონეები), და უფლება  ჰქონდათ გაეგრძელებინათ ეკონომიკური საქმიანობა, აღნიშნული ობიექტების მიერ, მათივე გადაწყვეტილებით საქმიანობის შეჩერების შემთხვევაში, ისინი ვალდებულები არიან, აღნიშნულის თაობაზე აცნობონ საგადასახადო ორგანოს, რათა არ დაეკისროთ ფიქსირებული გადასახადი (სიტუაციური სახელმძღვანელო N 2538).

იმის გათვალისწინებით, რომ ცალკეული სამეწარმეო საქმიანობა შეჩერებულ იქნა საქართველოს კანონმდებლობით (მთავრობის დადგენილებით) მხარეთა ნებისგან დამოუკიდებლად, საგანგებო მდგომარეობის არსებობის პერიოდში მეიჯარის მიერ გაწეული მომსახურება, (რომელზეც არ არის გადახდილი საიჯარო გადასახდელები მოიჯარის მიერ), არ განიხილება მის მიერ უსასყიდლოდ გაწეულ მომსახურებად, ხოლო მოიჯარისთვის - სარგებლად და შესაბამისად გადასახდებით დაბეგვრის ობიექტად. ამასთან, თუ საგანგებო მდგომარეობა მოიცავს არასრულ თვე(ებ)ს, აღნიშნული მიდგომა გავრცელდება სრულ თვე(ებ)ზე (სიტუაციური სახელმძღვანელო N 2537).

იმის გათვალისწინებით, რომ საზოგადოებრივი ტრანსპორტით გადაადგილება შეჩერდა საქართველოს კანონმდებლობით (მთავრობის დადგენილებით) და დაქირავებულთა ტრანსპორტირების გარეშე შეუძლებელია პირის (დამქირავებლის) ეკონომიკური საქმიანობის შეუფერხებლად განხორციელება, დაქირავებულთა სხვადასხვა ფორმით ორგანიზებულ გადაყვანასთან დაკავშირებით საგადასახადო ვალდებულებები არ წარმოიქმნება (სიტუაციური სახელმძღვანელო N 2539).

საქართველოს მთელს ტერიტორიაზე საგანგებო მდგომარეობის შემოღების გათვალისწინებით, საქართველოს მთავრობის მიერ მიღებული გადაწყვეტილებით ტურიზმის სექტორში დასაქმებულ გადასახდის გადამხდელებს და იმ ბიზნესსუბიექტებს, რომელთაც შეჩერებული აქვთ საქმიანობა, შექმნილი სიტუაციიდან გამომდინარე გადაუვადდათ დეკლარირებული საგადასახადო ვალდებულებები საშემოსავლო და ქონების  გადასახადში, რომლებმაც დაარეგისტრირეს და მიიღეს დადებითი პასუხი განცხადებაზე „საშემოსავლო და ქონების გადასახადებში დეკლარირებული საგადასახადო ვალდებულებების გადახდის გადავადების“ თაობაზე. აღნიშნულ დავალიანებაზე გადახდევინების უზრუნველყოფის ღონისძიებები არ გავრცელდება.  გარდა, ზემოთ აღნიშნული საგადასახადო დავალიანებისა, კანონმდებლობით გათვალისწინებულ ვადაში თანხის გადაუხდელობის შემთხვევაში შემოსავლების სამსახურს აქვს უფლება გამოიყენოს დავალიანების გადახდევინების უზრუნველყოფის ღონისძიებები.

ვადაგასული ან/და გამოსაყენებლად ან შემდგომი მიწოდებისთვის უვარგისი სასაქონლო-მატერიალური ფასეულობების ჩამოწერისთვის საჭიროა დაარეგისტრიროთ ელექტრონული განცხადება „ვადაგასული ან/და უვარგისი სასაქონლო-მატერიალური ფასეულობის ჩამოწერის დოკუმენტის დადასტურება“https://eservices.rs.ge/ServiceRequestNew.aspx?p=163

დეტალური ინფორმაციის სანახავად ჩამოწერის პროცედურასთან დაკავშირებით, გთხოვთ გადახვიდეთ ბმულზე https://www.rs.ge/Default.aspx?sec_id=4911&lang=1

,,საქართველოში ახალიკორონა ვირუსის გავრცელების აღკვეთის მიზნით გასატარებელი ღონისძიებების დამტკიცების შესახებ“ საქართველოს მთავრობის 2020 წლის 23 მარტის N181 დადგენილების მე-13 მუხლის საფუძველზე, შეჩერდა კანონმდებლობით დადგენილი ადმინისტრაციული საჩივრის წარდგენისა და განხილვის ვადები.

შენიშვნა: 2020 წლის 23 მარტის მდგომარეობით და მას შემდეგ საგანგებო მდგომარეობის მოქმედების პერიოდში, გადასახადის გადამხდელების დროებითი აღრიცხვის ბარათზე (სადაც ასახულია ინფორმაცია დარიცხული საგადასახადო ვალდებულებების/სანქციების შესახებ, რომლის გასაჩივრების ვადა ჯერ არ გასულა, ან მიმდინარეობს საგადასახადო დავის წარმოება) აღრიცხული საგადასახადო ვალდებულებები/სანქციები პირადი აღრიცხვის ძირითად ბარათზე გადატანილი იქნება საგანგებო მდგომარეობის გაუქმებიდან 31-ე დღეს, თუ პირს აღნიშნულ ვადამდე არ გაუსაჩივრებია საგადასახადო/საბაჟო ორგანოს შესაბამისი გადაწყვეტილება, ხოლო საგანგებო მდგომარეობის გაუქმებიდან 21-ე დღეს, თუ პირს აღნიშნულ ვადამდე არ გაუსაჩივრებია დავის განმხილველი ორგანოს გადაწყვეტილება.